Ыам ыйын 13 күнэ

IT –Кииҥҥэ педагогтар П.Е.Николаев, А.Е.Максимов үөрэнээччилэригэр анаан "Ночь в IT'  коммунарскай сбор тэрийдилэр. Сборга айтищник уолаттар көхтөөх кыттыыны ыллылар. "Үөрэх дьылын түмүктүүр ураты форматтаах коммунарскай сборга  "IT" уонна "Инженеры будущего" куруһуоктартан  уопсайа 13 оҕо   кытынна. Андриан Егоровичтыын  оонньуу арааһын бэлэмнээн ыыттыбыт, көрү- нары оройуттан  туттубут.  "Кто хочет стать миллионером", "Угадай мелодию" , "Дойду историятын туһунан викторина", "КП көрдөөһүнэ", "Тылы таайыы" диэн сэргэх оонньуулар буоллулар. Хас биирдии оонньууга кыайыылаах оҕолор өйдөбүнньүк бириис ыланнар үөрүү бөҕө, онон  киирсии кытаанаҕа буолла. Ону таһынан сыллааҕы ситиһиилэри бэлиэтээтибит уонна эһиилги үөрэх дьылын былааннааһын буолла", - диэн Петр Егорович сбор туһунан кэпсиир.

Ыам ыйын 15 күнэ 

Сунтаардааҕы 1 нүөмэрдээх орто оскуола  1-8 кылаастарын  салайааччыларыгар Пионерияттан саҕалаан билиҥҥи оҕо хамсааһынын тэрилтэтитин туһунан мотивационнай бэсиэдэ ыытылынна. "Эппиэтинэстээх төрөппүттэр - бигэ туруктаах оҕо саас " диэн "Туллукчаан" оҕо сайдар киинин иитиллээччилэригэр, төрөппүттэригэр аһаҕас аан күнэ тэрилиннэ. Быйыл оҕо саадын бүтэриэхтээх оҕолор төрөппүттэрин кытта СЦДТ ыытар куруһуоктарын, студияларын кытта билистилэр. «Теремок» остуоруйаны тута оруоллары үллэстэн оонньоон көрдөрдүлэр, хомус абылаҥнаах тыаһын болҕойон иһиттилэр, көрдөөх оонньуу- үҥкүүгэ көхтөөхтүк кытыннылар. 

Ыам ыйын 16 күнэ

“От Пионерской организации до Движения первых” бырааһынньыктааҕы төгүрүк остуол буолла. Төгүрүк остуолга  Сунтаар, Бордоҥ, Тойбохой, Кириэстээх куустатын  тэрийээччи-педагогтара, старшай баһаатайдара, директор сүбэһиттэрэ, оскуола лидердэрэ Тамерлан Тихонов (СПТЛ-и), Лена Петрова  (ССОШ№1), Рада Николаева (гимназия) кытыннылар. Оҕо хамсааһынын тэрилтэтин үлэтин уопутуттан – “Орлята России”, “Тренд в школе”, “Навигаторы детства” программаларын, ыытыллар үлэлэр, баар кыһалҕалар тула аһаҕас кэпсэтии тэрилиннэ. Алтынньы ыйга ыытыллыахтаах  Н.М.Родионова аатынан “Зажигая сердца детей” күрэс, “Эрэл” уонна “Сунтаар улууһугар оҕо хамсааһыныгар киллэрбит кылаатын иһин” диэн диэн анал бэлиэлэр балаһыанньаларын кытта билистилэр. 

Ыам ыйын 17 күнэ

2022-2023 үөрэх дьылын түмүгүнэн  Н.М.Родионова аатынан Сунтаардааҕы оҕо дьоҕурун сайыннарар киин үөрэнээччилэригэр «Сыл ситиһиилэрэ» (Презентация успеха) тэрээһин үөрүүлээх чааһа буолла.  Салгыы бу сигэни баттаа СИГЭ

Ыам ыйын 18 күнэ
Ньургуһун күнүнэн эҕэрдэлээн туран 
“Бэйбэри”фольклор куруһуога (педагог Т.Н.Спиридонова), “Дьиэрэй” фольклор куруһуога (педагог Ю.М.Ананьева), “Золотая нить” иис куруһуога  (педагог Л.Н.Иванова), "Аргыс" оҕо видео студията (педагог Л.С.Ларионова), "Хамелеон" театральнай  куруһуок (педагог В.С.Зоммер) үөрэнээччилэрин айар кэнсиэртэрэ тэрилиннэ. Кэнсиэрди төрөппүттэр, эбэлэр, эһэлэр, кылаас салайааччылара, педагогтар кэлэн дуоһуйа көрдүлэр. Саамай аҕам саастаах, ытыктанар ыалдьытынан Сунтаар улууһун култууратын Дархана, алгысчыт Иван Федорович Васильев буолла. Кини хос сиэнэ Дэвид кэнсиэркэ хас да нүөмэргэ ситиһиилээхтик кытынна. 

Ыам ыйын 19 күнэ

«Выпускник-2023: кэм-кэрдии массыынатынан айан» диэн  оскуоланы бүтэрээччилэри чиэстиир үөрүүлээх тэрээһин үрдүк таһымҥа ыытылынна. СЦДТ 12 выпускнига Архипов Николай, Данилов Кирилл, Дьячковский Дьулуур, Иванов Владислав, Корнилов Руслан, Николаев Тимофей, Павлова Иранина, Поисеев Айсен, Потапов  Дамир, Саввинова Дайаана, Семенов Владимир, Спиридонов Эрнест 11 сыл үөрэммит, араас таһымнаах күрэстэргэ кыттыбыт сылларын, доҕотторун, үөрүүлээх түгэннэрин ахтан-санаан аастылар. Бу күн үөрэнээччилэргэ да, педагогтарга да элбэх эҕэрдэ, махтал тыллара этилиннэ. 
Күндү үөрэнээччилэрбитин өссө төгүл оскуоланы бүтэрэн олох киэҥ аартыгар үктэнэр үөрүүлээх түгэҥҥитинэн эҕэрдэлиибит. Эһиги дуобакка, саахымакка, архитектураны, кыраайы үөрэтиигэ ылбыт билиигит, оҕо киинэтигэр уһуллубут, компьютерга үлэлииргэ ылбыт үөрүйэххит, саҥарар-иҥэрэр дьоҕургутун сайыннарбыт, баһаатай оскуолатыгар уһуйуллубут сылларгыт инники олоххутугар, талар идэҕитигэр төһүү күүс буоллун. СЦДТга үөрэммит, сылдьыбыт сылларгытын умнубакка, сибээскитин быспакка биһигинниин мэлдьи бииргэ буолаарыҥ. 

Ыам ыйын 20 күнэ

“Сунтаар нэһилиэгин саахыматчыт дьиэ кэргэнэ” Аан дойдутааҕы Дьиэ кэргэн күнүгэр аналлаах саахымат турнирыгар барыта сэттэ хамаанда кытынна.
1 миэстэ - Света Софронова, Нелли Александровна дьиэ кэргэттэрэ
2 миэстэ - Айыына Григорьева, Алексей Прокопьевич дьиэ кэргэттэрэ
3 миэстэ - Уран-Дмитрий Григорьев, Люция Прокопьевна дьиэ кэргэттэрэ. 
"Саамай Ытык саастаах саахыматчыт" анал ааты Маргарита Ионовна Сидорова, онтон "Саамай кыра саахыматчыт" анал ааты Настя Попова  ыллылар. Кыайыылаахтар уонна кыттааччылар Сунтаар нэһилиэгин дьаһалтата уонна СЦДТ туруорбут өйдөбүнньүк бириистэринэн, мэтээллэринэн наҕараадаланнылар. 

Нэдиэлэ устата «Чөл эт-сиин – доруобай олох» диэн  эти-хааны чэбдигирдэр хамсаныылар буоллулар, «Пионерскай тэрилтэттэн билиҥҥи оҕо хамсааһыныгар диэри” хаартыска, кинигэ, баннер быыстапкалара турдулар. СЦДТы сайтыгар "Сахалыы тыыннаах "Союзмультфильм" улуустааҕы дистанционнай ойуулук күрэһин түмүгэ таҕыста.   

“ЭҔЭРДЭ, ПИОНЕРИЯ!» пионерскай тэрилтэ төрөөбүт  күнүгэр аналлаах Нэдиэлэ туһунан сырдатыылары, иһитиннэриилэри бу сигэлэртэн  билсиэххитин сөп. 

ЮТУБ

Сунтаар Сонуннара   

Нэдиэлэ бэлиэ күннэрэ

Көмүөл мууһа өрө көтөҕүллэн, күүскэ устар кэмигэр, кус-хаас үөрдээн күргүөмүнэн кэлэр түгэнигэр, ньургуһун сибэкки тоҥ буору тобулан тахсарын уруйдаан ыам ыйын 17 күнүгэр биир идэлээхтэрбит Лидия Ивановна Григорьева күн сирин көрбүт төрөөбүт күнэ уонна Георгий Константинович Николаев үбүлүөйдээх үтүө мааны күннэрэ буоллулар. Онтон ыам ыйын 19 күнүгэр Пионерия күнүн айхаллаан саҥа киһи, сиэн уол орто дойдуга оройунан түстэ. Ол курдук биир идэлээхпит Мария Павловна Афанасьева дьиэ кэргэнигэр күүтүүлээх сиэн, тапталлаах уол оҕо айыы аймаҕын араҥаччылаары, удьуор ситимин ууһатаары күн сиригэр кэлбит үөрүүтүн тэҥҥэ үллэстэбит, эҕэрдэ эриэккэһин этэбит. 

Кыһыл хаалтыс доҕордоох,
Горн, барабаан аргыстаах,
"Бэлэм буол! Мэлдьи бэлэммин!"
 Ыҥырар-угуйар тыллардаах 
Оҕо сааспыт сырдык ырата
ПИОНЕРИЯ күнүттэн
Күүстэ ылыах,
Иннибит диэки
Киэҥник хардыылыах!

Кэлэр нэдиэлэ тэрээһиннэрэ

Ыам ыйын 22 күнэ – оскуолаларга Тиһэх чуораан чугдаарар бырааһынньыга. 
Ыам ыйын 23 күнэ – «Дебют» нуучча дуобатыгар алын кылаас үөрэнээччилэрин ортотугар үөрэх дьылын түмүктүүр турнир. Күрэскэ Сунтаар нэһилиэгин 1-2, 3-4 кылааһын (уол, кыыс) дуобатчыттара  кыттыыны ылыахтара. 
Ыам ыйын 24 күнэ- В.Г.Павлов аатынан Сунтаардааҕы алын сүһүөх оскуолатыгар Тиһэх чуораан.
Ыам ыйын 25 күнэ – «Радуга Севера» өрөспүүбүлүкэтээҕи үөрэнээччилэр айар быыстапкаларын улуустааҕы түһүмэҕэ. 
Нэдиэлэ устата -  бэс ыйын 5-25 күннэригэр аһыллар «Дебют” сайыҥҥы оҕо лааҕырыгар суруйтарыы, бэлэмнэнии үлэтэ ыытыллар.

 Айна Яковлева