Маннык самыырдаах күн итии чэй иһэ-иһэ, минньигэс сакалаат сии-сии сөбүлүүр кинигэҕин ааҕартан, билиини хаҥатартан ордук сынньалаҥ, уоскулаҥ баарын билбэппин. Кинигэ баар - бараммат баай диэн санаанан салайтаран уһун сынньалаҥҥа оҕо ааҕыытын көҕүлүүр сыалтан СЦДТ "ДЕБЮТ Эдэр худуоһунньук" күнүскү лааҕыра оҕо библиотекатыгар ыалдьыттаатыбыт. Киэҥ билиилээх, сэргэх кэпсээннээх библиотекарь Мария Ивановна Никифорова оҕолорго кинигэни ааҕыы, уларсыы быраабылатын кэпсээтэ. Оҕоҕо аналлаах айымньылартан бэрт сэргэх тургутууну (викторина) ыытта. Ким элбэхтик аахпыт киэҥ билиилээх минньигэс бириис ылла. Түмүккэ оҕолор сэргээбит сурунаалларын, кинигэлэрин уларсан кинигэ доҕордоох лааҕырдарыгар салгыы сынньана бардылар. 

@ayna_yakovleva0301