С.А.Зверев-Кыыл Уолун аатынан түмэл айар талааннаах дьон быыстапкатын тэрийэрэ үтүө үгэскэ кубулуйда. Бу сырыыга оҕо дьоҕурун сайыннарар киин эбии үөрэхтээһин уһуйааччылара Людмила Колодезникова, Варвара Иванова "Иис-ART" быыстапкаларын үөрүүлээх быһыыга майгыга арыйдылар. Быыстапкаҕа  Людмила тикпит сахалыы мааны таҥастарын, моделларын көрүөххэ сөп.   Уруһуйга уһуйааччы Варвара компьютернай графика ньыматынан  уруһуйдаабыт 2D уруһуйдара көрдөрүүгэ турда.  Кэлбит ыалдьыттар, көрөөччүлэр кыргыттар үлэлиир тэрилтэлэрин салайааччытыгар Ангелина Владимировна Антоноваҕа бу  курдук эдэр педагогтары  мэлдьи өйүүрүн, кинилэри үрдүккэ кынаттыырын бэлиэтээн эттилэр. Бу күн Людмилаҕа, Варвараҕа "Сунтаар улууһун норуотун маастара" үрдүк ааттары иҥэрдилэр. Бэйэтэ туспа, ураты суоллаах кыргыттар айар талааннара, дьоҕурдара өссө үрдүккэ кынаттана турдун. Быыстапка көрдөрүүгэ муус устар 29 күнүгэр диэри туруоҕа.

Мира Афанасьева