Итинник ааттаах Бүтүн Арассыыйатааҕы бырайыак чэрчитинэн бүгүн улуус оскуолаларын үөрэнээччилэригэр олус сэргэх тэрээһин буолла.

Ол курдук, бу соторутааҕыта тэриллибит оҕо уонна ыччат “Движение первых” хамсааһын иһинэн 12 хайысхаттан биирдэстэрэ — “Хранители истории”. Онон бүгүҥҥү тэрээһин манна ананна.

Тойбохойтон, Күндэйэттэн, Хороттон, Сунтаардааҕы политехническай лиссиэйтэн үөрэнээччилэр уонна Н.М.Родионова аатынан Оҕо дьоҕурун сайыннарар кииҥҥэ дьарыктанар оҕолор кытыннылар.

Оҕолор үөрэх мусуойугар “Үөрэх – духуобунай өй-санаа быстыспат сорҕото” диэн бэрт интэриэһинэй лиэксийэни иһиттилэр. Оҕолорго мусуой сэбиэдиссэйэ Альбина Иванова биһиги улууспутугар олорон, үлэлээн ааспыт, үөрэҕирии сайдыытыгар кылааттаах дьоммут тустарынан билиһиннэрдэ, үгүс элбэх хаартыскалары оҕолор сэргии көрдүлэр. Оттон С.А.Зверев-Кыыл Уолун аатынан Сунтаардааҕы мусуойга ыытыллыбыт тэрээһиҥҥэ Василий Слепцов Сергей Зверев-Кыыл Уолун ыччаттарын туһунан оҕолорго кэпсээтэ.

Ол кэннэ “Албан аат” болуоссатыгар прапорщик Александр Неустроев салалтатынан гирлянда уурдулар.
Сүрүн тэрээһин С.А.Зверев-Кыыл Уолун аатынан норуот айымньытын киинигэр ыытылынна. Манна Арассыыйа былааҕын күөрэччи тутан киирэн Арассыыйа уонна Саха Өрөспүүбүлүкэтин өрөгөй ырыаларын толордулар.

Сунтаардааҕы оҕо дьоҕурун сайыннарар киин бырайыактарынан педагогтар Галина Лидочен, Руслан Иванов, Айна Яковлева лекцияларын иһиттилэр. Улуус бэтэрээннэрин Сэбиэтин бэрэссэдээтэлин Афанасий Васильев кэс тылын оҕолорго анаата уонна ыччат бэлиитикэтин салаатын сүрүннүүр исписэлииһэ Николай Лидочен эҕэрдэтин эттэ.
Хас биирдии кыттааччыга “Хранители истории” диэн бэлиэлээх бэриэт туттардылар.

Дмитрий Петров видеосюжета