Сыл аайы алтынньы 9 күнүгэр Бүтүн Арассыыйатааҕы ааҕыы күнэ ыытыллар. 2007 сыллаахха сэтинньи 24 күнүгэр национальнай ааҕыы бырагырааммата ылыныллан аан бастаан олоххо киирбитэ. Бу бэлиэ күн дойду үрдүнэн ааҕыыга, кинигэҕэ уһуйуллар, интэриэһи тардар араас таһымнаах тэрээһиннэр буолаллар. Сүрүн сыала – Арассыыйа саамай ааҕар дойду буоларын ситиһии. Онон сиэттэрэн Сунтаардааҕы кииннэммит бибилэтиэкэ ситимэ уонна Сунтаар улууһун үөрэҕириитин саламтата“Ааҕар Сунтаар” бырайыак чэрчитинэн Араассыыйаҕа «Учуутал уонна Уһуйааччы”, Сунтаар улууһугар “Төрөөбүт төрүт тыл” сылыгар аналлаах учуутал туһунан саха классик уонна билиҥҥи кэм суруйааччыларын айымньыларынан дорҕоонноохтук “МИН САХАЛЫЫ ААҔАБЫН” улуустааҕы аахсыйа ыыттылар. Киэн туттар суруйааччыларбыт айымньыларын ааҕан култуурунай, литературнай сибээһи олохтоотубут, бөҕөргөттүбүт, сахалыы ааҕыы эйгэтин кэҥэттибит.

 Аахсыйаҕа тэрилтэлэр планеркаларыгар салайааччылар, оскуола дириэктэрдэрэ, учууталлара,  бибилэтиэкэрдэрэ, үөрэнээччилэрэ, уһуйааннар иитээччилэрэ, тэритэлэринэн үлэ кэллэктииптэрэ, биирдиилээн дьиэ кэргэттэр көхтөөх кыттыыны ыллылар. Кыттааччылар Л.А.Попов аатынан киин бибилэтиэкэтэ бэлэмнээбит сүбэлиир ыйынньыгынан туһаннылар. Ол курдук,  Николай Габышев “Дьиҥнээх учуутал” кэпсээниттэн,  Николай Якутскай «Учуутал»,  Уйбаан Нуолур «Алаас ахтылҕана» кинигэтиттэн «Устудьуон уонна учуутал» ахтыытын,  «Умнуллубат эдэр саас» ахтыы кинигэтиттэн уо.д.а.аахтылар. Улуус үрдүнэн 58 былаһаакка тэриллэн 846 киһи кыттынна. Саамай үрдүк көрдөрүүлээх нэһилиэктэринэн  Элгээйи, Тойбохой, Сунтаар, Күүкэй, Бордон буоллулар.  Салҕыы “Ааҕар Сунтаар” бырайыак салҕанан былааҥҥа киирбит араас таһымнаах тэрээһиннэр тиһигин быспакка ыытыллыахтара. Күндү ааҕааччыларбытын мэлдьи бибилэтиэкэҕэ күүтэбит, тэрээһиннэрбитигэр кыттаргытыттан олус үөрэбит, махтанабыт.

“МИН САХАЛЫЫ ААҔАБЫН” улуустааҕы аахсыйа кыттааччыларын видеоларын сиһилии бу сигэнэн баттаан көрөргүтүгэр ыҥырабыт.

https://youtube.com/playlist?list=PL1VPy16hhXLOIr1L9Ao55roPHpYcZY4Uo&si=kCtZQrKD_qXHhaUh 

Источник: https://sunlibrary.ru/