Н.М.Родионова мемориальнай (өйдөбүнньүк) дуоскатын арыйыы, кини  аатын Сунтаардааҕы оҕо дьоҕурун сайыннарар кииҥҥэ иҥэрии тэрээһинэ

     Ахсынньы 8 күнэ, 2020 с., күнүс 2 чаастан төлөннөөх сүрэхтээх пионер баһаатай, муударай салайааччы, үтүө киһи аатын үйэтитэр, кини сырдык аатын умнубакка кэлэр көлүөнэлэргэ хаалларар сыалтан Сунтаардааҕы оҕо дьоҕурун сайыннарар кииҥҥэ Н.М.Родионова аатын иҥэрэр уонна  мемориальнай дуосканы арыйар тэрээһин  ыытылынна.

     РОДИОНОВА Надежда Михайловна, Сунтаардааҕы оҕо дьоҕурун сайыннарар киин директорынан 31 сыл устата үлэлээбитэ, педагогическай үлэ бэтэрээнэ, РСФСР үөрэҕириитин туйгуна, «За доброе сердце и профессионализм» мэтээл хаһаайката, «Дети Саха-Азия» Аан дойдутааҕы фонд стипендиата, Учууталлар учууталлара, Саха Өрөспүүбүлүкэтин үөрэҕириитин  үтүөлээх  үлэһитэ,  «Эбии үөрэхтээһиҥҥэ кылаатын иһин», «Сунтаар улууһун үөрэҕириитигэр кылаатын иһин» бэлиэ хаһаайкалара, Сунтаар нэһилиэгин Бочуоттаах олохтооҕо, Саха Өрөспүүбүлүкэтин «Гражданскай килбиэн» бэлиэ хаһаайката этэ.

     Ис сүрэҕиттэн умайа сылдьар төлөннөөх пионер баһаатай, биир тэрилтэни уһун сылларга сатабыллаахтык салайбыт директор, барыбыт кыһалҕатын, үөрүүтүн тэҥҥэ үллэстэр биир идэлээхпит, улахан иллээх дьиэ кэргэн бас-көс киһитэ, сайаҕас майгылаах истиҥ дьүөгэ, үтүө сүбэһиппит - Надежда Михайловна Родионова биһиги кэккэбититтэн туораабыта бүгүн биир төгүрүк сыл буолла. Кини сырдык аатын үлэлээбит, айбыт-туппут тэрилтэтэ сүгэрэ улахан эппиэтинэс уонна элбэххэ эбээһинэстиир.

   Сунтаар улууһа (оройуона) муниципальнай тэриллии баһылыга Григорьев Анатолий Васильевич Надежда Михайловна аата оҕо дьоҕурун сайыннарар кииҥҥэ иҥэриллибитинэн уонна өйдөбүнньүк дуоска арыллыбытынан эҕэрдэлээтэ уонна Иванов Альберт Ионович, Григорьева Лидия Ивановна,  Иванов Андрей Егорович буоланнар мемориальнай дуосканы арыйдылар.

       Сунтаардааҕы оҕо дьоҕурун сайыннарар киин директора Антонова Ангелина Владимировна Надежда Михайловна  туһунан сайты билиһиннэрдэ. Сунтаар  улууһун  баһылыгын солбуйааччыта  Еремеев Гаврил Михайлович, улуус үөрэҕириитин салалтатын начальнига Иванов Альберт Ионович, “Сунтаар нэһилиэгэ” муниципальнай тэриллии баһылыгын солбуйааччыта Федоров Федор Семенович уонна аймахтарын аатыттан быраата Данилов Владимир Иванович иһирэх ахтыылары оҥорон ахтан-санаан аастылар.

Айна Яковлева,

«Н.М.Родионова аатынан Сунтаардааҕы оҕо дьоҕурун сайыннарар киин” директоры иитэр үлэҕэ солбуйааччыта.