"Тапталлаах СЦДТым"
2023-2024 үөрэх дьылыгар Сунтаардааҕы оҕо дьоҕурун сайыннарар киин (Пионердар дьиэлэрэ) төрүттэммитэ 65 сыллаах үөрүүлээх  үбүлүөйүн бэлиэтиэҕэ.  Араас сылларга үөрэммит, үлэлээбит, бииргэ алтыспыт  күндү үөрэнээччилэрбитин, биир идэлээхтэрбитин, төрөппүттэрбитин кытта сэргэх көрсүһүүлэр, интэриэһинэй тэрээһиннэр былааннаналлар. Онтон билигин үөрэнэ, үлэлии сылдьааччылар  ситиһиилэрбит барыта бу үтүө датаҕа ананаллара саарбаҕа суох.  

Бэҕэһээ СЦДТга  бастакы сылларын дьарыктанар үөрэнээччилэрбитин кытта иһирэх көрсүһүү буолла. Үөрүүлээх линейкаҕа  Хомсомуол 105 сылыгар анаммыт  быыстапканы Галина Лидочен оҕолорго билиһиннэрдэ. Эҕэрдэ кэнсиэркэ 3 в кылаас үөрэнээччилэрэ (у/у салайааччы Тамара Спиридонова) «Сырдык саҕах»  хоһоону доргуччу аахтылар, VZ устуудьуйа үөрэнээччилэрэ (у/у салайааччы Вера Зоммер ) "Сыдьаайа"  коллекцияларын көрдөрдүлэр.  Түмүккэ ыраах Канада Торонто куоратыгар ыытыллыбыт аан дойдутааҕы бэстибээлгэ «Төрүт омуктар тылларын харыстааһын иһин” анал аат кыайыылааҕа буолбут "Дьыл оҕуһа" диэн сахалыы ойуулугу көрөн баран ис хоһоонун ырытыһыы буолла.

"Ураа, күһүҥҥү сынньалаҥ"
Бастакы үөрэх чиэппэрэ түмүктэннэ, күһүҥҥү уһун сынньалаҥнар саҕаланнылар. Ол эрэн сэтинньи ый саҥатыгар  ыытыллар "Я-профи' өрөспүүбүлүкэтээҕи Чемпионакка бэлэмнэнии күүстээх күннэрэ үүннүлэр. Барыта тоҕус компетенцияҕа 40-ча оҕо Сунтаар улууһуттан кыттыыны ылыаҕа. 
Алтынньы 31 күнүгэр Сунтаардааҕы гимназияҕа кииннээн төрөөбүт төрүт тылбытын  саха тылын харыстыыр, сайыннарар сыаллаах оҕолорго уонна учууталларга «Айымньылаах Ийэ тыл»  диэн сэргэх тэрээһин ыытыллыаҕа. Онтон сэтинньи 3 күнүгэр Сомоҕолоһуу күнүн көрсө күннэтэ алтыһар, СЦДТга дьарыктанар кылаас кэллэктииптэригэр анаан ПЕРЕЗАГРУЗКА-2023 сбор буолуоҕа.

«Үһүс көлүөнэ оскуолата»
Быйылгы үөрэх дьылыгар «Үһүс көлүөнэ оскуолата” бэһис сылын бэйэтин үлэтин салгыыр. Сынньалаҥҥа олорор ыал эбээлэрэ, эйэҕэс эдьиийдэрэ педагог Людмила Иванова тула түмсэн кыбытык тигии кистэлэҥнэрин үөрэтэллэр. «Бу сыллар усталаах-туораларыгар барыта 70-ча далбар хотун бэйэтигэр анаан кыбытык тигиинэн суумка, олбох, бэл дьыбаан сабыытын кытта тигиннэ. Саамай уһуннук сөбүлээн дьарыктанар үөрэнээччилэрим 2018 сылтан сылдьыбыт Лидия Петрова, Розалия Уарова, Светлана Винокурова о.д.а. буолаллар”, - диэн Людмила Николаевна кэпсиир. Хомсомуол 105 сылын көрсө иистэнньэҥнэр Галина Лидочен быыстапкатын астына көрдүлэр, эдэр саас ырыатынан Розалия Уарова эҕэрдэтин иһиттилэр.  Быыстапкаҕа  РДК кулуубун макетын көрөн уруккуну-хойуккуну санастылар, өйдөбүнньүк гынан хаартыскаҕа түстүлэр. 

Маастар-кылаас
Эбии үөрэхтээһин педагога, биир идэлээхпит  Зинаида Иванова элбэх оҕолоох күн-күбэй ийэ, тапталлаах кэргэн, улахан дьиэ кэргэн маанылаах кыыһа арааһа сатаабата диэн суох буолуо. Туох саҥаны билбитин, сатаабытын биир идэлээхтэрин кытта үллэстэр үтүө, сайаҕас майгылаах. Бүгүн хаһыат кумааҕытынан өрүллэр корзинаны хайдах оҥорорго маастар-кылаас ыытта. Сылдьыбыт эрэ барыта үөрэнэн, саҥаны билэн тарҕастыбыт. 
Маастар-кылаас быыһыгар Кутанаттан, Күндэйэттэн педагогтар Мария Афанасьева, Мария Трофянова, Дьокуускайтан Петр Егоров, ыраах  Кисловодск куораттан директорбыт Ангелина Владимировна телефонунан быһа сибээскэ тахсан бэйэ-бэйэбитин эҕэрдэлэһэн, истиҥник кэпсэтэн ахтылҕаммытын таһаардыбыт.  Мария Павловна гитаранан доҕуһуолаан "Ферма кыргыттарын"  уонна уоттаах төлөннөөх Комсомол ырыаны доргуччу ыллаатыбыт. 

Кэлэр нэдиэлэ сэргэх сонуннаах буоллун. 

Айна Яковлева