"ОЛОҤХОНУ КЫЛААҺЫНАН ТОЛОРУУ"  улуустааҕы  күөн- күрэскэ кыттааччыларга үөрэтэр-семинар Сунтаарга ыытылынна.

Ааптар Саха Өрөспүүбүлүкэтин үөрэҕириитин туйгуна, норуот ырыаһыта, оҕо дьоҕурун сайыннарар киин Кутанатааҕы филиалын үрдүк категориялаах педагога Мария Павловна Афанасьева.  Мария Павловна үгүс сыллаах үлэтин уопутун тарҕатар сыаллаах, Сунтаар олоҥхо дойдута буоларын бигэргэтэр санааттан  кылааһынан олоҥхону толоруу  бырайыагы олоххо киллэрдэ. Сүрүн тэрийээччинэн уонна өйөөччүнэн улуустааҕы үөрэҕирии, култуура салаалара уонна Сунтаардааҕы оҕо дьоҕурун сайыннарар киин буоллулар. Үөрэтэр семинарга  култуура үлэһиттэрэ, фольклорга уһуйааччылар, эбии үөрэхтээһин педагогтара, кылаас салайааччылара, оскуола үөрэнээччилэрэ кыттыыны ыллылар. 
 "Улууска оскуола оҕолоругар олоҥхону билиһиннэрии, үөрэтии билиҥҥи туруга" диэн темаҕа кэпсэтии, санаа атастаһыыта тэрилиннэ. 
"Олоҥхону кылааһынан толоруу" бырайыак балаһыанньатын чопчуластылар, кыттар кылаастары чуолкайдаатылар. 
Эбиэт кэнниттэн практическай дьарык буолла. Манна Мария Павловна үөрэнээччилэрэ 
өрөспүүбүлүкэҕэ биллэр эдэр олоҥхоһуттар, олоҥхо күрэхтэрин хас да төгүллээх Кылаан кыайыылаахтара  Айсен Фёдоров,  Туйаара Алексеева, Александра Яковлева кыттыыны ыллылар уонна олоҥхоттон быһа тардыылары,  матыып араастарын толорон иһитиннэрдилэр.  Сунтаар нэһилиэгин үөрэнээччилэрэ маастар кылааска кыттан тылы имитии, кылыһах таһаарыы, тойугу толоруу албастарын биллилэр. Былатыан Ойуунускай "Дьулуруйар Ньургун Боотур" олоҥхотуттан быһа тардан толорбуттара сэҥээриини ылла. Маастар, уһуйааччы, оҕо бары өттүттэн туһалаах дьарыкка сылдьан аны ахсынньы ыйга олоҥхону кылааһынан толоруу күөн күрэһигэр көрсүөххэ дылы диэн тарҕастылар.