Олохтоох бэйэни салайыныы органнара – судаарыстыба норуокка саамай чугас, быһаччы дьайыылаах алын сүһүөҕэ буолаллар. Төһө да олохтоох бэйэни салайыныы судаарыстыба органнарын кытта биир тиһиккэ киирбэтин, тутулуга суоҕун иһин, дьон-норуот былаас, салалта үлэтин аан-бастаан нэһилиэк, улуус баһылыктарын, депутаттарын үлэлэринэн сыаналыыр, араас кыһалҕалаах боппуруостарга аан бастаан олохтоох дьаһалта боруогун атыллыыр. Онон, олохтоох бэйэни салайыныы үлэтиттэн дойдубут күннээҕи олоҕо-дьаһаҕа, инники сайдыыта, дьон-норуот былааска сыһыана быһаччы тутулуктаах. Муус устар 21 күнэ – олохтоох бэйэни салайыныы күнэ. Бу бэлиэ күн Сунтаар улууһун үөрэнээччилэрэ улуус баһылыгын, тустаах салалта салайааччыларын, муниципальнай сулууспа ытыктабыллаах бэтэрээннэрин кытта көрсүһэн, ирэ-хоро кэпсэтэн, интэриэһиргиир ыйытыыларыгар хоруй ылар үтүө тэрээһиннэрэ Сибиэрэп киинигэр буолла. Көрсүһүү тэрийээччилэрэ - “Сунтаар улууһа (оройуона)» муниципальнай оройуон дьаһалтата, улуустааҕы үөрэҕирии салалтата, Н.М.Родионова аатынан Сунтаардааҕы оҕо дьоҕурун сайыннарар киин. Көхтөөх кыттааччыларынан улуустааҕы Үөрэнээччилэр Сэбиэттэрин кыттыылаахтара, үрдүкү кылаас үөрэнээччилэрэ (Сунтаар сэл. оскуолаларыттан, Бордоҥ, Тойбохой, Кириэстээх куустатын оскуолаларыттан), быыстапкаҕа экскурсия ыытааччы оҕолор, оскуола директордарын сүбэһиттэрэ уонна история, обществознание учууталлара буоллулар. Араас сылларга Сунтаар, Хочо улуустарын салайбыт, баһылыгынан үлэлээбит салайааччыларга анаан туруоруллубут быыстапка үөрүүлээх арыллыыта кэлбит дьон болҕомтотун тарта, киэҥ сэҥээриитин ылла. "Былаастыын сэһэргэһии” аһаҕас кэпсэтиигэ улуус баһылыга А.В. Григорьев, солбуйааччылара Н.П.Александров, Б.С.Васильев, Г.М., депутаттар оройуоннааҕы Сэбиэттэрин бэрэссэдээтэлэ У.Д.Попова, улуус администрациятын дьыалатын сүрүннээччи Н.Е.Егоров, тустаах салалта салайааччылара – үөрэҕирии салайааччыта А.И.Иванов, ФКУ салайааччыта Ю.Ю.Васильев, култуура уонна айылгы салалтатын салайааччытын солбуйааччыта С.Д.Омукова, тыа хаһаайыстыбатын салалтатын салайааччыта В.Ф.Анисимов, тутуу салалтатыттан Ю.А.Афанасьев, спорт отделын салайааччыта С.А.Павлов, ыччат салаатын сүрүннүүр специалиһа Н.В.Лидочен, баай-дуол сыһыаннаһыыларын кэмитиэтиттэн А.Н.Андреев кыттыыны ыллылар үөрэнээччилэр ыйытыыларыгар хоруйдаатылар. Актыыбынайдык, дьоһуннаахтык кэпсэтиигэ кыттыспыт үөрэнээччилэр улуус дьаһалтата туруорбут туоһу суруктарынан бэлиэтэниэхтэрэ. БЫЛААСТЫЫН СЭҺЭРГЭҺИИ аһаҕас көрсүһүүгэ улуус үөрэнээччилэриттэн суругунан киирбит ЫЙЫТЫЫЛАР. 1 ыйытыы Үтүө күнүнэн. Сайын ыһыахтарга молодежнай күрэх буолуо дуо? Саха норуотун күрэхтэригэр – мас тардыһыы, хапсаҕай, үс төгүл үс оонньуулара. Д. Дмитриев, 8 кыл. 2 ыйытыы Дорооболоруҥ. Федеральнай суолга тратуар суох, саас халтараан кэмигэр олус кутталлаах. П. Дьулусхан 3 ыйытыы Өбүгэ оонньууларын оскуола программатыгар киирэрин туох дии саныыгыт. П. Ньургуйаана, 10 кылаас 4 ыйытыы Үтүө күнүнэн, бу соторутааҕыта телевизионнай проект “Күн оһуокайа” буолан ааспыта. Сунтаар улууһугар итинник проектар буолуохтара дуо олоҥхо, тойук, оһуокай. С. Айсула 5 ыйытыы Тоҕо Сунтаарга центральнай отопление хас биирдии дьиэҕэ киирбэтий? И. Карина 6 ыйытыы Үтүө күнүнэн, биһиги Сунтаарбыт сайдарыгар эдэр ыччат уонна оҕолор тугу гынан көмө буолуохпутун сөбүй? П.Тускул. 7 ыйытыы Убаастабыллаах Сунтаар улууһун салайааччылара мин ба5а санаам 1. Активист оҕолору Россия таһымнаах лааҕырдарга элбэхтик ыыталларыгар 2. Патриотическай иитиини күүһүрдэргэ хас биирдии оскуоланы форманан хааччыйалларыгар 3. Тойбохой оскуолатыгар улахан спорткомплекс үчүгэй араас оборудованиенан хааччыйыы. С. Богдан 8 ыйытыы Дорооболоруҥ. Бу биһиэхэ соторунан Ленин площадь курдук проектар өссө тутуллаллар дуо? В.Айсена.

Айна Яковлева