Быйыл, Н.М. Родионова аатынан Сунтаардааҕы оҕо дьоҕурун сайыннарар кииҥҥэ, үгэс быһыытынан, «Дебют» оҕо сынньанар лааҕыра үлэлээтэ. Уопсайа 40 оҕо хабыллан бастакы сезоҥҥа сынньаннылар. Манна иккистэн саҕалаан ахсыс кылааска диэри араас саастаах оҕолор бааллар. 
Лааҕыр оҕолорун көрөн-харайан, иитэн-үөрэтэн Егор Михайлович Родионов, Егор Бекназарович Мурзабаев, Тамара Николаевна Спиридонова, Елена Анатольевна Томская, Варвара Владиславовна Иванова уонна лааҕыр салайааччыта Юлия Михайловна Ананьева илдьэ сырыттылар. Оҕолор доруобуйаларын Екатерина Егоровна Бугдасова, Сунтаар 1-№дээх орто оскуолатын медига көрдө-иһиттэ. Онтон минньигэс аһылыгынан Мария Иннокентьевна Малышева, Сунтаар 1-№дээх орто оскуолатын повара аһаталаата. 
Оҕолор лааҕырга араас дьарыктарга сырыттылар. Хомуска дьарыктанар оҕолор маастарыстыбаларын үрдэтэргэ уонна сайыннарарга үлэлээтилэр, робототехника дьарыгар алын кылаас уолаттара робот таҥыытын баһылаатылар, саахымат дьарыгар сылдьааччылар эбии маастарыстыбаларын үрдэттилэр уонна айар мастарыскыайга дьарыктаммыт оҕолор дьэрэкээн оҥоһуктары оҥордулар. 
Дьарыктары таһынан оҕолор араас тэрээһиннэргэ сырыттылар: сибэкки олордууга Зинаида Афанасьевна Тертюхова маастар-кылаас көрдөрдө, Тамара Николаевна саады киэргэтэр араас матырыйаалынан оҥоһуллар киэргэллэри оҥорууга маастар кылаас ыытта, Андриан Егорович пластиктан тыалга эргийэр пропеллер онорорго үөрэттэ,  Лидия Семеновна Ларионова оҕолорго туустаах тиэстэнэн оҥоһук оҥорорго көрдөрдө. Лааҕырга баһаатайа  Каролина Григорьевна Михайлова, Дьокуускай пед. коллеһын устудьуона, оригаминан оҥоһуктарга маастар-кылаас ыытта. 
Оҕолор лааҕыр кэмигэр Сунтаар киин библиотеката ыыппыт Нууча тылын күнүгэр аналлаах тэрээһиҥҥэ кыттыыны ыллылар. Тойбохойго Г.Е. Бессонов аатынан кыраайы үөрэтэр түмэлигэр экскурсиялаабыттара, Россия күнүгэр аналлаах тэрээһиҥҥэ кыттыыны ылбыттара. Эколог күнүгэр айылҕаҕа тахсыы буолбута. Манна көрдөөх эстафета, канат тардыһыы, былаах былдьаһыыта уонна футбол күрэхтэрэ буолбуттара. Спорт күнүгэр мас тардыһыытын күрэҕэ уонна улахан саахымат хонуутугар оонньуу буолбута. Батарейканан барар массыналар күрэхтэригэр Тимофеева Стелла тэҥнээҕин булбатаҕа.
Иитэр-үөрэтэр үлэҕэ төһүү күүс буолан лааҕыр үлэтин кэмигэр ПДН, МЧС уонна ГАИ инспектордара кэлэн интэриэһинэй бэсиэдэлэри аахпыттара. 
Лааҕырга сылдьар оҕолор улуус ыһыаҕар “Күнчээн” түһүлгэҕэ ыытыллар фольклорга күрэстэрин аһыллыытыгар флешмоб үҥкүүлээбиттэрэ, тойук, хомус, хоһоон ааҕыытыгар, оһуохай тылын этии күрэхтэригэр кыттан кэккэ ситиһиилэммиттэрэ. Ол курдук:
1.    “Сунтаарым мин дойдум” бөлөҕүнэн хоһоон ааҕыытыгар Анал аат (400 солк бириис);
2.    Эрэл Чыбыков “Мин хомустаахпын” хоһоон ааҕыытыгар – 3 миэстэ (500 солк.) бириис);
3.    Девид Васильев уолаттарга тойук курэҕэр - 3 миэстэ;
4.    “Дуорай” хомус ансаамбылын улахан бөлөҕө –1 миэстэ;
5.    Андрей Алтынаров – хомус күрэҕэр Гран При;
6.    “Бэйбэри” куруһуок салайааччыта Т.Н. Спиридонова хомус күрэҕэр - 2 миэстэ;
7.    Дайаана Ераскумова хомус күрэҕэр оҕолорго - 1 миэстэ. 
Лааҕырга сылдьыбыт оҕолор уонна төрөппүттэр иитээччилэргэ бэйэлэрин махталларын этэн үөрүүлэрэ үгүс.

Ананьева Ю.М. Начальник лагеря "Дебют"