Бу күннэргэ Дьокуускай куоракка  оҕону сынньатар, чэбдигирдэр лааҕырдары тэрийээччилэр өрөспүүбүлүкэтээҕи форумнара буолан ааста. «Саха сынньалаҥ -2022» Форумҥа 21 улуустан, куораттан барыта  150-чэ ыалдьыт, кыттааччы үс күн устата кэпсэтии былаһааккаларыгар, маастар-кылаастарга, сонун бырайыактары билиһиннэрэр дьаарбаҥкаҕа сылдьан биир идэлээхтэрин кытта санаа атастастылар, уопуттарын үллэһиннилэр. Бырабыытылыстыба дьиэтин аактабай саалатыгар СӨ үөрэҕин уонна наукатын министрэ Ирина Любимова, Бырабыытылыстыба бэрэссэдээтэлин солбуйааччыта Сергей Местников, Москва куораттан ыалдьыт, оҕо сынньалаҥын тэрийэр федеральнай киин директора Леонид Проценко анал дакылааттарын истэн баран 2022 сыллааҕы оҕо сынньалаҥын хампаанньатын түмүгүн таһаардылар, баар кыһалҕалары, инники былааннары торумнаатылар.

Сунтаар улууһун дэлэгээссийэтэ форум бары тэрээһиннэригэр көхтөөхтүк кыттан “Сосновый бор” сынньалаҥ киинигэр, Бүтүн аан дойдутааҕы Арктическай оскуолаҕа (МАШ) сырытта.  Үөрүүлээх аһыллыы кэнниттэн доруобуйаларыгар хааччахтаах оҕолору кытта үлэҕэ туһуламмыт “Нет преград...” секцияҕа Сунтаардааҕы коррекционнай оскуола-интэринээт старшай баһаатайа Агния Спиридонова «Надежда” лааҕыр  туһунан, «Проектирование программ для организаций отдыха и оздоровления детей» диэн секцияҕа “Ситис” интеллектуальнай киин үлэтин уопутун директор Марианна Григорьева, «Партнерство в сфере организаций отдыха и оздоровления детей» секцияҕа Н.М.Родионова аатынан Сунтаардааҕы оҕо дьоҕурун сайыннарар киин эбии үөрэхтээһин педагога Петр Егоров “Промышленнай профориентационнай автотур” туһунан билиһиннэрдилэр. Онтон А.К.Акимов аатынан Күүкэй орто оскуолатын  историяҕа учуутала Сааскылаана Ильина  «ДЗСОЛ «Альфа-Спасатель» лааҕыр ыыппыт үлэтин онлайн кэпсээбитин сэргээн иһиттилэр, элбэх боппуруостары ыйыттылар.

Онтон лааҕырдар үлэлэрин дьаарбаҥкатыгар Форум кыттыылаахтарын сэргэ Дьокуускай куораттан 15 оскуола кыттан улахан түһүлгэни төрүттээтилэр.  Сунтаардар «Время чудес” улуустааҕы лааҕырдар Форумнарын уонна экспериментальнай промышленнай автотур үлэтин презентациялаан уопут атастастылар.

Форум кыттыылаахтара Бүтүн Россиятааҕы «Смена”, “Орлёнок” оҕо кииннэрин, Приморскай кыраай “Жемчужина”, “Алые паруса”,  өрөспүүбүлүкэтээҕи «Булуус уһаайба”, “Лингва”, “Сосновый бор”  о.д.а. лааҕырдар үлэлэрин, программаларын  видеоконференц-сибээһинэн билсэн баран аныгы кэм лааҕырын мадыалын  бырайыактаатылар, резолюция ылыннылар.  

Форум саамай өрөгөйдөөх чааһынан 2022 сыл түмүгүнэн «Оҕо сынньанар, чэбдигирэр лааҕырдарын бастыҥ программата”өрөспүүбүлүкэтээҕи конкурс түмүгүн таһаарыы буолла. «Лучшие программы стационарных лагерей» номинацияҕа 2 миэстэ – “Ситис” интеллектуальнай киин – “Мой мир здоровья и самореализации» программата (директор М.В.Григорьева), «Лучшие программы палаточных лагерей» номинацияҕа  2 миэстэ – Н.М.Родионова аатынан Сунтаардааҕы оҕо дьоҕурун сайыннарар киин (директор А.В.Антонова) «Экспериментально-профориентационный промышленный автотур» ааптар П.Р. Егоров программата  кыайыылааҕынан тахсаннар 15 тыһыынчалаах сэртипикээтинэн, грамотанан наҕараадаланнылар. Онтон улуустааҕы үөрэҕирии салалтатын иитии уонна эбии үөрэхтээһин отделын сүрүннүүр исписэлииһэ Сааскылаана Семенова оҕо сынньалаҥын тэрийиигэ таһаарыылаах үлэтин иһин Саха Өрөспүүбүлүкэтин Бырабыытылыстыбатын Махтал Суругунан бэлиэтэннэ.

Саха сынньалаҥ -2022 көрсүөххэ диэри, эрэнэ күүтэбит Саха сынньалаҥ - 2023!

Айна Яковлева