Сунтаардааҕы В.Г.Павлов аатынан алын сүһүөхтээх оскуола успуорт саалатыгар дроннар уонна «Покорители дорог» кыра салаллар массыыналар күрэхтэрэ бастакытын буолан ааста.

Күрэҕи Сунтаардааҕы оҕо дьоҕурун сайыннарар киин (дириэктэр Ангелина Антонова) тэрийэн ыытта.

Дронунан күрэххэ барыта 19 оскуола оҕото кытынна. Кинилэр икки бөлөххө арахсан куоталастылар: 5-8 уонна 9-11 кылаас үөрэнээччилэрэ. Күрэхтэһии үс түһүмэхтэн турда. Тиһэх киирсиигэ үс оскуола оҕолоро күөн көрүстүлэр – Арыылаах орто оскуолата, политехническай лиссиэй уонна Сунтаардааҕы 1 №-дээх орто оскуола.

Оҕолор анал былаһааккаҕа дроннарын көтүттүлэр. Трассалара үгүс мэһэйдэртэн турда. Сытыы киирсии түмүгүнэн хамаанданан күрэххэ кыайыылааҕынан Арыылаах орто оскуолата таҕыста. Кинилэр орто көрдөрүүлэрэ 42,32 сөк. тэҥнэстэ. II миэстэни политехническай лиссиэй, III миэстэни 1 №-дээх орто оскуола оҕолоро ыллылар.

Биирдиилээн күрэхтэһиигэ 5-8 кылаас үөрэнээччилэригэр 37,30 сөк. көрдөрүүлээх политехническай лиссиэй үөрэнээччитэ Никита Яковлев бастаата. II, III миэстэлэри Юра Соловьев (1 №-дээх оскуола), Олимпий Иванов (Арыылаах оскуолата) ыллылар. 

9-11 кылаастарга кыайыы өрөгөйүн Арыылаах орто оскуолатын 9-с кылааһын үөрэнээччитэ Арчын-Андрей Андреев биллэ. Кини көрдөрүүтэ – 23,69 сөкүүндэ. II миэстэҕэ Владислав Новгородов (политехническай лиссиэй), III миэстэҕэ Юрий Попов (1 №-дээх оскуола) таҕыстылар.

Салаллар массыыналар күрэхтэригэр уопсайа 18 оҕо кытынна: автомоделларга уонна гоночнай массыыналарга. Бастакы көрүҥҥэ кыайыылааҕынан Аллыҥа орто оскуолатын 5-с кылааһын үөрэнээччитэ Артур Саввинов буолла. II миэстэни Айсен Назаров (Устье) ылла.

Гоночнай массыыналарга кыайыылааҕынан Владислав Павлов (лиссиэй) буолла. II, III миэстэлэри Юра Попов уонна Айсен Иванов (иккиэн оҕо дьоҕурун сайыннарар киин) ыллылар.

Биирдиилээн күрэхтэһии кубогынан 3 мүн. 28 сөк. биэтэккэ кэлэн Владислав Павлов наҕараадаланна. Хамаанданан кубогы Оҕо дьоҕурун сайыннарар киин хамаандата ылла. Кыттыбыт оҕолор анал сэртипикээти туттулар, бириистээх миэстэҕэ тиксибиттэр кырааматанан бэлиэтэннилэр.

Ааптар: Гаврил АНДРЕЕВ.