Сэтинньи 15 күнэ - Бүтүн Арассыыйатааҕы армияҕа ыҥырыллааччы (призывник) күнэ. Бу күнү бэлиэтээн С.А.Зверев-Кыыл Уолун аатынан төрүт култуура киинигэр Призывник күнэ үрдүк тэрээһиннээхтик ыытылынна. Ийэ дойдуларын иннилэригэр ытык иэстэрин төлүү барыахтаах уолаттары улуус баһылыгын солбуйааччыта Г.М.Еремеев, улуус байыаннай комиссара И.С.Данилов, улуус бэтэрээннэрин сэбиэтин бэрэссэдээтэлэ А.К.Васильев, ыччат бэлиитикэтин отделын начальнига Т.А.Иванов, И.С.Иванов аатынан Сунтаардааҕы 2№-дээх орто оскуола эдэр армеецтара эҕэрдэлээтилэр. Улуус Аҕаларын сэбиэтин бэрэссэдээтэлэ Б.М.Уларов, улуустааҕы саллааттар ийэлэрин комитетын салайааччыта С.Н.Янкова уонна төрөппүттэр ааттарыттан эйэҕэс эбэ Г. М. Васильева амарах алгыс тылларын анаатылар, харысхал бэлиэлэри бэлэхтээтилэр. Туйаара Алексеева кылыһахтаах тойугунан, «Түһүлгэ» норуодунай үҥкүү ансаамбылын толоруутугар «9 мэҥэ хамсаныы» үтүө мааны ис хоһоонноох тэрээһини ситэрэн-хоторон биэрдилэр. Тохтобулга Мария Афанасьевна Тараярова Олоҥхо күнүн көрсө бэлэмнээбит быыстапкатын сэргээн көрдүлэр. Арчын Ераскумов призывниктар ааттарыттан харда тыл эттэ.
«Биир сыллаах сулууспаҕыт этэҥҥэ, санааҕыт хоту түмүктэннин. Төрөөбүт Сунтааргыт, дойдугут иннигэр ытык иэскитин чиэстээхтик төлөөн кэлээриҥ», - диэн бүгүҥҥү күн кыттыылаахтара хас биирдии уолаттарга эттилэр.

 @ayna_yakovleva0301