Главная » 2022 » Сентябрь » 22 » Сунтаарга промышленнай автотур
09:30
Сунтаарга промышленнай автотур

Балаҕан ыйын 5-10 күннэригэр үөрэнээччилэр инники идэлэрин талалларыгар туһаайыллыбыт Бүлүү эҥэр, Миирнэй улуустарын устун промышленнай автотур ыытылынна.

Тэрийээччилэр:  Сунтаар улууһун администрацията, улуустааҕы үөрэҕирии салалтата, Н.М.Родионова аатынан Сунтаардааҕы оҕо дьоҕурун сайыннарар киин.

 Улуустан барыта 24 үөрэнээччи, педагогтар -  Петр Егоров, Галина Лидочен, Надежда Потапова, Анна Иванова, Айна Яковлева икки хайысханан: Сунтаар-Тойбохой-Миирнэй-Светлэй-Арыылаах (Новай)-Сунтаар уонна Сунтаар-Ньурба-Үөһээ-Бүлүү-Ороһу-Бүлүү-КыҺыл-Сыыр-Кэнтик-Уустуйа-Сунтаар сырыттылар. Автотур кыттыылаахтара ити ааттаммыт нэһилиэнньэллээх пууннарга, куораттарга сылдьан орто, үрдүк үөрэх кыһаларыгар - Светлэйдээҕи энергетика, нефть уонна гаас колледжыгар, Бүлүүтээҕи профессиональнай-педагоическай колледжка, Мирнэйдээҕи политехническэй институкка, промышленнай объектарга – СунтаарАвтодорга, Сунтаарцеолитка, Светлинскэйдээҕи ГЭС (Бүлүүтээҕи ГЭС-III), ЯТЭК, тыа хаһаайыстыбатыгар – Новай совхозка сырыттылар.  Төрөөбүт кыраайы үөрэтэр баай ис хоһоонноох түмэллэри – Тойбохойго Г.Е.Бессонов кыраайы үөрэтэр комплексын, Ньурбаҕа К.Д.Уткин аатынан Норуоттар доҕордоһууларын түмэлин, Үөһээ-Бүлүү Ороһутугар К.С.Чиряев аатынан уонна Кэнтиккэ “Чап уустара” түмэллэри   көрдүлэр. Оскуолаларга сылдьан саастыылаахтарын кытта көрсөн доҕордоһуу биэчэрин тэрийдилэр, студеннардыын көрсөн орто анал үөрэххэ, үрдүк үөрэххэ туттарсыы туһунан ыйыталастылар, үөрэнэр корпустар устун интэриэһинэй экскурсияҕа сырыттылар. Ньурбатааҕы ИТ-куб үлэтин-хамнаһын кытта билистилэр.

Айан устата үөрэнээччилэр “Идэ азбуката”, “Промышленнай предприятиелар каарталара”, “Эдэр корреспонденнар” диэн  этэрээттэринэн хайдыһан анал бырайыактары суруйдулар,  «Селфи-тур” хаартыскаҕа түстүлэр, айанньыт дневнигин толордулар. Салгыы автотур устата тугу саҥаны билбиттэрин, интэриэһинэй дьону кытта көрсүһүүлэрин барытын түмэн, сааһылаан баран бырайыагы чөкөтүү, түмүктүүр үлэни оҥоруу этэрээттэринэн буолла.

Балаҕан ыйын 20 күнүгэр промышленнай тур кыттыылаахтара төрөппүттэрин  иннигэр үлэлэрин отчуоттаатылар. Саамай өйдөөн хаалбыт интэриэһинэй түгэннэрин кэпсээн, санаа атастастылар, сиппит-хоппут бырайыактарын билиһиннэрдилэр. Владислав Иванов, Айхал Копылов, Майя Колесникова, Айхал Васильев, Денис Дмитриев, Амир Иванов, Даяна Федорова  - “Идэ азбуката”, Эмилия Иванова, Артем Еремеев, Эрнест Спиридонов, Дамир Потапов - “Промышленнай предприятиелар каарталара”, Айхал Тимофеев, Иранина Павлова -  “Эдэр корреспонденнар” үлэлэрин мустубут ыалдьыттар сэргээн иһиттилэр, ыйытыылары биэрдилэр. Төрөппүттэр ааттарыттан Наталья Степанова:  “Оҕолор бу айантан элбэҕи билэн, олус сайдан  кэллилэр. Аҕыйахтык сылдьыбыт куораттарын промышленнай тэрилтэлэрин кытта билсэн, сабыылаах стратегическай объектарга киирэн, техническэй үөрэхтэргэ ханна үөрэниэххэ сөбүн ыйыталаспыттара инники идэлэрин сөпкө талалларыгар олук буолуоҕа”.

Автотур кыттыылаахтарын ааттарыттан сылаастык, сымнаҕастык илдьэ сылдьыбыт уопутттаах суоппардарбытыгар Петр Николаевка, Иван Егоровка, Вячеслав Григорьевка уонна Николай Егоровка истиҥник махтанабыт.

Айна Яковлева

Просмотров: 9 | Добавил: Administrator | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]