«Учууталга махталыҥ – кини аатын үйэтитии” аахсыйа иккис төгүлүн Сунтаар улууһугар алтынньы 2-6 күннэригэр буолан ааста. Быйылгы аахсыйа Уһуйааччы уонна Аҕа сүбэһит сылын чэрчитинэн ыытыллар Саха Өрөспүүбүлүкэтигэр педагогическай декада уонна Учуутал күнүгэр анаммыта тэрээһин суолтатын дириҥэтэн, кэҥэтэн биэрдэ.

Тэрийээччилэр:  Н. М. Родионова аатынан Сунтаардааҕы оҕо дьоҕурун сайыннарар киин (дириэктэр Ангелина Владимировна Антонова), Сунтаардааҕы муниципальнай архыып (сэбиэдиссэй Аркадий  Егорович Яковлев) уонна улуустааҕы үөрэҕирии музейа (сэбиэдиссэй Альбина Григорьевна  Иванова)

Аахсыйа 2022 сыллааҕы үлэтин түмүгүнэн 102 учуутал аата Сахалыы Бикипиэдьийэҕэ киирбитэ. Иккис аахсыйа уратытынан Сунтаардааҕы оҕо дьоҕурун сайыннарар киин волонтердара улуус 11 нэһилиэктэринэн сырыттылар. Элгээйи, Күндэйэ, Кэмпэндээйи, Уустуйа, Бордоҥ, Илимниир, Бүлүүчээн, Наахара, Кириэстээх, Куокуну, Кутана нэһилиэктэрин оскуолаларыгар үлэлээбит учууталлар ааттарын "Сахалыы Бикипиэдьийэ" сетевой энциклопедияҕа киллэрээһиҥҥэ анаммыт эппиэтинэстээх дьону кытта үлэлэстилэр.  Ол курдук, Сахалыы Бикипиэдьийэҕэ киирэр учууталлар туһунан матырыйааллар ис хоһоонноругар сүрүн ирдэбиллэрин билиһиннэрдилэр. Элгээйи, Бүлүүчээн оскуолаларыгар техническэй киллэриигэ анаммыт үлэһиттэригэр Саха Бикипиэдьийэҕэ киирэр кыах бэрилиннэ, онон эбии информацияны ситэрэн киллэрэр буолуохтара.

Аахсыйа түмүгүнэн барыта холбоон Сунтаартан төрүттээх, араас кэмҥэ үлэлии сылдьыбыт 74 учуутал аата интэриниэт ситимҥэ киирдэ.

Быйыл ыытыллыбыт аахсыйаҕа көхтөөхтүк кыттыбыт оскуолары бэлиэтээн ааһар тоҕоостоох. Бордоҥ орто оскуолатын үлэһиттэрэ бу аахсыйа торумунан бэйэлэрин истэригэр Яковлева Ульяна Титовна салайыытынан кылгас кэмнээх үлэ тэрийэн биир күн иһигэр 21 учууталларын туһунан иһитиннэрии бэлэмнээтилэр. Маннык үлэни Күндэйэ оскуолатын педагог-библиотекара Иванова Виктория Валериановна, Кутана оскуолатын педагог-организатора Михайлова Саргылана Александровна, Уустуйа оскуолатын директорын сүбэһитэ, социальнай педагог Семенова Марианна Валерьевна, Кириэстээх оскуолатын педагог-библиотекара Коколова Галина Яковлевна ыыттылар.

Тэрийээччилэр ааттарыттан хас биирдии аахсыйаҕа кыттыбыт, бэйэтин кылаатын киллэрбит, учууталлар ааттара Саха Бикипиэдьийэҕэ киирэригэр көмө буолбут дьоҥҥо, үөрэнээчилэргэ бэлиэ суруктар туттарылыннылар. Сунтаар улууһун нэһилиэктэригэр тахсарбытыгар айаммытын тэрийэн күүс-көмө буолбут улуустааҕы ыччат салаатын начальнигар Трофим Алексеевич Ивановка  истиҥник махтанабыт.

Учуутал үрдүк аатыгар сүгүрүйүү, кини аатын үйэтитии үлэтэ салгыы ыытыллар.

Н. М. Родионова аатынан Сунтаардааҕы оҕо дьоҕурун сайыннарар киин пресс-киинэ.