Бэс ыйын 13-14 күннэригэр Сунтаар күөл күөх туонатыгар оҕо сайыҥҥы лааҕырдарын 4-с Форума үрдүк таһымҥа ыытылынна. Форумҥа үлэ-сынньалаҥ лааҕырдарыттан  13 этэрээт, 235 оҕо, 30-ча лааҕыр начальниктара, үлэһиттэрэ кыттыыны ыллылар.  Үөрүүлээх чааска улуус баһылыгын солбуйааччыта Еремеев Г.М., үөрэҕирии салалтатын начальнига Иванов А.И. уонна СЦДТ директора Антонова А.В. истиҥ эҕэрдэлэрин эттилэр. Салгыы тэрийээччилэр улуус үөрэҕириитин салалтата, Сунтаардааҕы оҕо дьоҕурун сайыннарар киин  оҕолорго интэриэһинэй күрэхтэри ыыттылар. Форум  кыттыылаахтара визиткаларын, бивуактарын  көрдөрдүлэр, минньигэс бүлүүдэ астаан аҕаллылар, "Лааҕыр олоҕуттан  биир күн " хаһыат конкурсугар кытыннылар. "Идэлэр куораттара" модульга 11 хамаандаҕа ("Эко-проект", "Оҕо саас, эдэр саас, ситиһии",  "IT-технология" "Доруобуйа, МЧС" "Воркшоп", "Национальнай куукуна", "Уустар. Эко-мода", "Социолог", "Шоу кистэлэҥэ", "Флористика", "Бэйэм бэйэбэр сценариспын" ) арахсан  үлэлээтилэр. "Инникибит бэйэбит илиибитигэр" кэпсэтии былаһааккатыгар оҕолор доруобуйа, ыччат, үөрэҕирии, социальнай эйгэ үлэһиттэрин кытта көрсөн "2030 сылга Сунтаар оройуонун сайдыыта" программаны торумнастылар, санаа атастастылар. Хас биирдии күрэх түмүгүнэн хамаандалар "лааҕыр валютатын" - лагериты ылан мунньуннулар, онон кыайыыга дьулуур күүстээхтик, илин-кэлин түсүһүү сытыытык барда. Ыҥырыылаах ыалдьыттар Аширбекова А.Б салайааччылаах "Диаданс" эдэр  акробаттара флеш моб, "СунАМП" педагогтар түмсүүлэрэ "Күүстээхтэр, кыахтаахтар, сымсалар" күрэхтэри ыыттылар. Сунтаар мааны Далбар Хотуна Пустолякова Л.Н. күнү көрсүү сиэрин-туомун көрдөрдө. Сайыҥҥы үрүҥ түүҥҥэ үҥкүү дьоро түһүлгэтэ, сарсыарданан эти-хааны чэбдигирдэр хамсаныы көхтөөхтүк тэрилиннэ.

Форум түмүгүнэн саамай элбэх лагериттаах, көхтөөх ТИМИР УУС этэрээт (лиссиэй, нач. Никитина С.К.) -  бастакы, ДЕБЮТ этэрээт (СЦДТ, нач. Мурзабаев Е.Б.)  -иккис, ТУОС ТУОЙ этэрээт (лиссиэй, нач. Попова А.А.) - үһүс бочуоттаах миэстэлэри ылан грамотанан, сыаналаах бириистэринэн наҕараадаланнылар. "Саамай көхтөөх дьиэ кэргэн" номинацияны Сунтаартан Никитиннэр дьиэ кэргэттэрэ, "Саамай ыраахтан кэлбит лааҕыр" номинацияны Кириэстээхтэн ДЬУЛУУР (нач. Усова О.Ф.) ыллылар уонна өйдөбүнньүк бэлэхтэри ыллылар. Форум быыстапкатыгар кыттыбыт ТУОЙ ТУОС, ТИМИР УУС этэрээттэр (лиссиэй) "Преемственность " номинация буоллулар.

Форум кыттыылаахтара үөрэн-көтөн, доҕордоһон, уопут атастаһан тарҕастылар. Аны икки сылынан сайыҥҥы лааҕырдар форумнарыгар көрсүөххэ диэри!

Айна Яковлева